گجنی کی ریکارڈ ساز کامیابی نے ثابت کر دیا ہے کہ بالی وڈ میں عامر خان کا ثانی نہیں
نئے سال کے پہلے ہفتے میں بھلے ہی اب تک کوئی بڑے بینر کی فلم ریلیز نہ ہوئی ہو پر بالی وڈ اسٹار عامر خان کی گذشتہ سال دسمبر میں ریلیز ہوئی ہٹ فلم گجنی باکس آفس پر کامیابی کے تمام ریکارڈ توڑ نے کی راہ پر گامزن ہے۔

بھارتی فلموں کی تاریخ میں گجنی پہلی ہندی فلم بن گئی ہے جس نے ریلیز کے دو ہفتوں میں عالمی سطح پر 200 کروڑ روپے کا کاروبار کیا ہے۔ فلم میں ویلن کا نام گجنی ہے اور اُسی بُرے کردار پر فلم کا ٹائیٹل گجنی رکھا گیا جو کہ اب ہندی فلم انڈسٹری کی سب سے بڑی ہٹ فلم بن گئی ہے۔

ملک گیر سطح پر فلم گجنی کی ڈسٹریبیوٹر کمپنی 'انڈین فلم کمپنی' کی نائب صدر پریتی سہانی کے مطابق فلم گجنی نے بھارتی فلم مارکیٹ میں اب تک 162 کروڑ روپے اور بین ا لاقوامی مارکیٹ میں 39 کروڑ کا بزنس کیا ہے۔ فلم کی ریکارڈ توڑ کامیابی نےثابت کر دیا ہے کہ بالی وڈ میں عامر خان کا کوئی ثانی نہیں ہے۔

جنوبی بھارت کی تامل زبان کی فلم گجنی کے ہندی ری میک کو 1200 پرنٹس کے ساتھ پورے بھارت میں ریلیز کیا گیا تھا۔ عموما عامر کی فلموں سے سنیمابینوں کی کافی امیدیں وابسہہ رہتی ہیں پر شاید یہ خود عامر یا فلم کے ہدایت کار اے آر موروگادوس نے بھی تصور نہیں کیا ہوگا کہ بزنس کے اعتبار سے فلم گجنی شاہ رخ خان کی سپر ہٹ فلم 'دل والے دلہنیا لے جائیں گے' کو پیچھے چھوڑ کر بالی وڈ میں ایک نئی تاریخ مرتب کرنے کے اتنے قریب ہوگی۔ اس میں کوئی دو رائے نہیں کہ آنے والے چند ہفتوں میں ہی فلم گجنی آدتیہ چوپڑا کی فلم 
گجنی نے عامر خان نے خاص پر باڈی بلڈنگ کی تھی
 
'دل والے دلہنیا لے جائیں گے' کے 165 کروڑ روپے کے تاریخی ریکارڈ کو توڑ دے گی۔

گذشتہ سال کاروبار کے لحاظ سے بالی وڈ کے لیے مندہ رہا پر گجنی کی باکس آفس پر زبردست کامیابی نے فلم سازوں کو ایک نیا جوش اورحوصلہ دیا ہے۔ فلم گجنی کی کامیابی نے سال میں صرف ایک فلم سائن کرنے والے عامر کو نمبر ون اسٹار کی دوڑ میں سب سے آگے کر دیا ہے۔ اِس سے قبل ریلیز ہوئی عامر کی فلم 'تارے زمیں پر 'کو بھی فلم ناقدین اور سنیمابین دونوں کی ہی بھرپورستائش ملی تھی۔ یہی نہیں فلم 'تارے زمیں پر' کو اِس سال بھارت کی جانب سے آسکر کے لیے بھی نامزد کیا گیا ہے۔

واضح رہے کہ فلم ساز وکرم بھٹ کی فلم غلام کے بعد گجنی عامر کے کیریئر کی دوسری ایکشن سے بھرپور فلم ہے۔